Na anterior llexislatura un altu cargu socialista dixo que 'nun habría oficialidá, pero sí munches perres pa subvenciones'

A piques d'acabar la llexislatura pasada, en fiestes navidiegues, un dirixente socialista qu'ostentaba y ostenda inda güei una mui alta responsabilidá política n'Asturies, dixo-yos, según pudo saber l'ACRA pol testimoniu de persones presentes, que 'los socialistes nun daríen la oficialidá de la llingua na próxima reforma del estatutu, pero que diba haber perres a maza pa subvenciones'. Esta afirmación fízola'l cargu públicu, según les mesmes fontes, a un piñu de "intelectuales" afines al gobiernu d'entós, mentanto la so muyer tayaba un xamón. L'alcuentru tuvo llugar nun edificiu de l'alministración n'Asturies, col correspondiente agospiu de los invitaos, que na mayor parte salieron d'ellí 'convencíos d'abrazar un necesariu pragmatismu'.