Andecha Astur lleva l'escesu de coste d'El Musel a la oficina antifraude de la UE

Una delegación d'Andecha Astur, de la man del eurodiputáu d'Europa de los Pueblos, Mikel Irujo, va presentar mañana ante la OLAF (Oficina Antifraude de la Unión Europea) una denuncia polos fechos asocedíos nes obres d'ampliación del puertu d'El Musel, Xixón. P'Andecha Astur ye evidente que l'intentu del Principáu de "engañar" a la Unión Europea pa qu'asuma'l "inxustificable" escesu de coste d'El Musel, presentándolu como una "inesistente" segunda fase nes obres d'ampliación del mesmu, "entra dientro de lo que ta consideráu fraude y entiende que la UE nun sólo actuó correctamente negándose a aceptar l'engañu y nun concediendo dichos fondos, sinón que tien de continuar les sos actuaciones nel terrenu llegal determinando responsabilidaes y actuando en consecuencia", dixo Andecha Astur al traviés d'una nota prensa. Na denuncia non sólo se señala como responsable al Principáu, sinón tamién a la UTE axudicataria de les obres d'ampliación del puertu, pa determinar si'l fechu de xenerar de mou "consciente y voluntariu" tan multimillonariu escesu de coste escuende tamién intereses "fraudulentos".

Unidá diz que Montes «vende fumo» cola ordenanza del asturianu

«IU nun tien tantu interés en sofitar la llingua asturina como n'apuntase un tantu aununciáu como fechu históricu». Esto ye lo que dicen los dirixentes d'Unidá Nacionalista Asturiana (UNA) sobre la política seguida pol conceyal Jesús Montes Estrada como responsable de la conceyalía de Política Llingüística nel Ayuntamientu de Gijón. Pa UNA, Montes Estrada ye un «vendedor de humo» que da per bona «una mera declaración d'intenciones con una mui deficiente técnica xurídica y escasa, por non decir nula, virtualidá práctica». Al tiempu critiquen tamién les opiniones del edil comunista sobre la trescendencia de l'alegación d'Unidá y el so calter partidista y minoritariu.

Un nacionalista llogra ralentizar l'aprobación de la probetaya ordenanza del asturianu de Xixón

La ordenanza y plan de normalización de la llingua asturiana nel conceyu de Xixón tendrán d'esperar pa la so aprobación. Los raquíticos testos promovíos pola esquierda estatalista tendrán d'aguardar al Plenu ordinariu de payares, que se fadrá'l segundu viernes d'esi mes; y ello pola mor d'una alegación presentada por un militante d'una fuerza nacionalista (UNA). La reacción del conceyal comunista Jesús Montes Estrada dexó bien a les clares l'espíritu poco democráticu d'IX, y cómo-yos manca una verdadera participación ciudadana nos asuntos públicos. Les declaraciones del 'camarada Churruca' amuesen una indisimulada irritación cuando diz que "se trata de una alegación de un miembro de UNA que ni siquiera es de Gijón", o afirma que "se trata más que nada de una cuestión política de un grupo minoritario con una interpretación un pelín mezquina de la ordenanza". Hai que s'alcordar de la enmienda a la totalidá presentada al plan de normalización pol grupu de la oposición, el popular, que proponía más d'un cientu medíes nun testu munchu más ambiciosu.

Preséntase mañana en Xixon 'L'Atenéu Cultural Xuan María Acebal'

La presentación oficial del acabante formar Atenéu Cultural Xuan María Acebal va facese esti vienres, 10 d'ochobre, na Llibrería xixonesa Alborá llibros, a les siete y media la tarde, coincidiendo col 130 aniversariu del poema d'Acebal “El Amor del Hogar”. Nel actu presentaranse les actividaes de la organización y la so directiva, y después va cellebrase una llectura de poemes a cargu de diferentes persones venceyaes a la lliteratura, la politica y los medios de comunicación.

ACRA pidi medíes pol facer antiasturianu en dos colexos concertaos

Ante les acciones en dos colexos concertaos de Xixón, el San Vicente Paúl y L'Asunción, onde les respectives direcciones torgaron la posibilidá del enseñu de la llingua asturiana, a la contra de lo que diz la Llei d'Usu, l'Alianza Cívica Radical Asturiana va demandar, de los ámbitos alministrativos correspondientes, que de nun haber cambiu nestes actitúes antiasturianes, se proceda a la inmediata eliminación del conciertu económicu nesos centros.