Islandia a piques de dir a la bancarrota

Islandia, llider mundial de desarrollu humanu en 2007, ta a piques de cayer nel abismu. La crisis baltó a la banca, nacionalizada pol Gobiernu. La bolsa baxó nos índices un 77% nun solu día, el valir de la corona islandesa ta pel suelu y el país depende d'un creitu de Rusia y del FMI. A resultes d'ello, los islandeses atropen comida ante'l mieu de que les importaciones paren. Joh.annes Smari Oluffsson, xerente de la cadena de tiendes d'alimentación Bonus, nel principal centru comercial de Reykjavik dixo que 'dende fai una selmana esto ye una llocura'. Munchos bancos nun acepten la moneda'l país y el Gobiernu pidió a les entidaes bancaries que dean prioridá a les transacciones en moneda estranxero pa recursos esenciales como comida, fármacos y petróleu.

La Corte Internacional de Xusticia estudiará'l recursu de Serbia contra la 'independencia' de Kosovo

L'Asamblea Xeneral de Naciones Uníes alcordó dar lluz verde a la Corte Internacional de Xusticia (CIX) pa qu'estudie'l recursu presentáu por Serbia y decidir si la independencia de Kosovo ye llegal. Estímase que la CIX, con sede en L'Haya, tardaría ún o dos años n'aprobar un veredictu sobre esta cuestión. Pal gobiernu de Belgrado la neutralidá del tribunal va ayudar a rebaxar tensiones na rexón balcánica, pero los países qu'apoyen a Pristina, encabezaos polos EEXX, piensen qu'esta medida va pone-y pilancos a la integración de Kosovo na comunidá internacional.